Clau Dermont

politikwissenschaftler, rumantsch, bergler

Iniziativas, iniziativas!

Columna publicada en La Quotidiana ils 24 da mars 2015.

Las elecziuns vegnan! Partidas dretg e seniester sepreparan pil cumbat electoral per gl’atun saver reservar aschi bia sutgas sco pusseivel en las duas salas da parlament a Berna. Perquei havein nus tuts survegniu posta: quater milliuns, tschienventgasismelli e siattschiennavontasis exemplars digl «Extrablatt» ein tschell’jamna sgulatschai en mintga casada en Svizra. Per mintga scaffa da brevs in cedel da suttascripziun per l’iniziativa encunter tut quei ch’ei da tschella vart dalla seiv da nies curtgin.

Iniziativas paran dad esser igl instrument preferiu pil cumbat electoral. Quei sa denton era ir dall’aua giu: ils verd-liberals han fatg naufragi cun mo otg pertschien, la pcd ha dacuort fatg ina cunterproposta a l’atgna iniziativa perquei ch’els ein sezs buca pli aschi perschuadi da lur text. Omisduas partidas han lantschau lur iniziativas avon quater onns gest avon las elecziuns federalas.

Professiunalisau il giug d’iniziativas ha denton la pps. Ed ha success cun quella strategia. Bein che las iniziativas che vegnan atras ein neginas veramein realisadas, perquei che lur text violescha pilpli autras regulaziuns. Tuttina dat ei uss ina nova iniziativa dil pievel. Dil pievel? Ei ina iniziativa aunc dil pievel, sch’ina partida sa finanziar da tarmetter 4 126 796 cedels da suttascripziun en mintga casada? Ni eisi plitost l’iniziativa d’in pèr Turitges cun in pèr milliuns che drovan lur avantatg da budget per cargar la proxima salvia da l’indignaziun?

L’idea d’iniziativas ei atgnamein che minoritads hagien in instrument da far attent il public e la politica sin lur propostas, ch’il pievel hagi dapli pusseivladads da separticipar allas decisiuns politicas che mo d’eleger il parlament mintga quater onns. Denton paucas iniziativas ein ozilgi veramein dil «pievel», pil pli eisi apparats da partida ch’organiseschan ch’ina certa tematica setschenta sin la tribuna politica.

Sche iniziativas ein mo pli in instrument da marketing per elecziuns, sch’il rimnar in’iniziativa reducescha sin la damonda d’haver avunda daners, lu ei l’idea dall’iniziativa sfalsificada. Lu eisi da sedumandar sche quels che defendan ils dretgs dil pievel il pli fetg ein buca quels che subverteschan la democrazia directa il pli fetg.

Nächster in Artikel

Vorheriger in Artikel

© 2017 Clau Dermont

Thema von Anders Norén | Entrada